Наркожиноятларга қарши янги жазо чоралари белгиланди
Ўзбекистонда гиёҳвандлик воситалари ва психотроп моддалар билан боғлиқ жиноятлар учун жавобгарлик чоралари янада кучайтирилди. Бу ҳақда 2026 йил 11 июнда қабул қилинган ЎРҚ–1151-сонли Қонунда белгиланган.
Жиноят кодексига киритилган ўзгартишларга мувофиқ, гиёҳвандлик воситалари, психотроп моддалар ёки уларнинг аналогларини ишлаб чиқариш, тайёрлаш ва қайта ишлаш мақсадида ноқонуний нарколаборатория ташкил этган шахслар 5 йилдан 10 йилгача озодликдан маҳрум этилади.
Шунингдек, гиёҳвандлик воситалари, психотроп моддалар, уларнинг аналоглари ёки кучли таъсир қилувчи моддаларни истеъмол қилиш ёки тарқатиш учун бангихона ташкил этиш ва сақлаш 3 йилдан 5 йилгача озодликдан маҳрум қилиш билан жазоланади.
Қонунга кўра, мазкур моддаларнинг ноқонуний муомаласига ҳомийлик қилиш учун ҳам жавобгарлик кучайтирилиб, бундай қилмишни содир этганларга 5 йилдан 8 йилгача озодликдан маҳрум қилиш жазоси қўлланилади.
Бундан ташқари, кучли таъсир қилувчи ёки заҳарли моддаларни ўғрилик ёки фирибгарлик йўли билан қонунга хилоф равишда эгаллаган шахсларга нисбатан 3 йилгача ахлоқ тузатиш ишлари, 2 йилдан 5 йилгача озодликни чеклаш ёки 5 йилгача озодликдан маҳрум қилиш жазолари белгиланди.
Долзарб мавзулар
Mақолага баҳо беринг
0/50
0
0
0
0