Тошкент вилоятининг Ангрен шаҳрида дайди итлар галаси ҳужуми оқибатида 8 ёшли бола ҳаётдан кўз юмди.

Маълумотларга кўра, марҳум бола Ангрен шаҳридаги “Истиқлол” маҳалласида онаси билан вақтинча ижара уйида яшаб келган. Унинг отаси эса Россияда меҳнат қилиб юргани айтилмоқда.

Қўшниларнинг сўзларига кўра, бола мактабдан уйига қайтиб келаётган вақтда дайди итлар галаси ҳужумига учраган. Оғир жароҳатлар туфайли у воқеа жойидаёқ вафот этган.

Фарзанди мактабдан кечикиб келаётганидан хавотирга тушган онаси уни излаб кўчага чиққан. Бироқ аёл ўғлини жонсиз ҳолда топган.

Маҳалла аҳолиси таъкидлашича, ушбу ҳудудда дайди итлар муаммоси бир неча йилдан бери долзарб бўлиб келмоқда. Улар бу ҳайвонлар одамларга ҳам ҳужум қилиб тураётганини айтмоқда.

“Бир неча йилдан бери шу муаммо билан яшаяпмиз. Дайди итлар бизга ҳам ташланади. Афсуски, фожиа юз берди”, — дейди маҳалладошлардан бири.

“Истиқлол” маҳалласи фуқаролар йиғини раиси Ҳилола Умарованинг маълум қилишича, ушбу ҳолат туман ҳокимлиги ҳамда ички ишлар органлари томонидан назоратга олинган.

Эслатиб ўтамиз, аввалроқ Янгийўл тумани ва Чирчиқ шаҳрида ҳам дайди итларнинг болаларга ҳужуми ҳақида хабарлар тарқалган эди.