Жиззахда кичик бизнесни бошлаш учун янги имконият
Жиззах вилоятида Агробанк ташаббуси билан ускуналар маркази очилди. Энди ўз бизнесини йўлга қўйиш ёки ишлаб чиқариш ҳажмини ошириш истагида бўлган аҳоли зарур техникаларни бир жойда танлаши, уларнинг имкониятларини ўрганиши ва молиялаштириш масаласини ҳал қилиши мумкин.
Марказда қандолатчилик, қадоқлаш, босмахона ва бошқа ишлаб чиқариш йўналишларига мўлжалланган ускуналар намойиш этилган. Тадбиркорлар техникаларнинг ишлаш жараёнини кўздан кечириб, улардан фойдаланиш бўйича амалий кўникмаларга эга бўлиши мумкин.
Мутахассислар ҳар бир мурожаатчининг бизнес ғояси ва имкониятларидан келиб чиқиб, мос ускуна ҳамда технологик ечимларни тавсия этади. Шу билан бирга, «Лойиҳалар фабрикаси» билан ҳамкорликда бизнес-режа ишлаб чиқилади.
Тадбиркорлар танланган ускунани харид қилиш учун Агробанк кредитини марказнинг ўзида расмийлаштириш имкониятига ҳам эга.
Лойиҳа доирасида техникаларни етказиб бериш, ўрнатиш ва ишга тушириш, шунингдек, кейинги фаолият давомида сервис хизматлари кўрсатиш ҳам ташкил этилади.
Агробанкнинг бу ташаббуси, айниқса, ўз ишини бошламоқчи бўлиб, нимадан бошлашни билмаётганларга анчагина қўл келади.
