Бу нақд пулдан кўра, электрон тизимдан давлатга ўрта ҳисобда ҳар ой қўшимча 10 млрд сўм маблағ тушмоқда, дегани.

Тошкент шаҳрида 2025 йил 1 январдан бошлаб жамоат транспортида нақд пул ўрнига тўлиқ электрон тўлов тизими жорий этилганидан сўнг, кунлик тушумлар сезиларли даражада ошгани маълум қилинди.

“Тошшаҳартрансхизмат” АЖ маълумотларига кўра, ҳозирда автобус йўналишларида бир иш кунида ўртача 2 миллиард сўм миқдорида йўлкира ҳақи электрон тўловлар орқали йиғилмоқда. Таққослаш учун, 2024 йилнинг мос даврида бу кўрсаткич 1,7 миллиард сўмни ташкил этган эди. Натижада тушумлар 17,6 фоизга ошган.

Мутахассисларнинг қайд этишича, электрон тўлов тизимининг тўлиқ жорий қилиниши молиявий интизомни кучайтириш, ҳисоб-китобларда шаффофликни таъминлаш, нақд пул айланмасини камайтириш ҳамда йўловчилар учун қўшимча қулайлик яратишга хизмат қилмоқда.

Шунингдек, электрон тўловдан фойдаланувчилар турли чегирмалардан фойдаланиш имкониятига эга бўлиб, йўл ҳақини хавфсиз ва тезкор тарзда амалга оширмоқда.

Мулоҳаза қилсангиз, аслида нақд пул тўловида ҳам ҳар ой шу маблағ йўловчилардан йиғиб олинган бўлса не ажаб. Лекин бу давлат ғазнасига тушмай келган. Хўш савол туғилади. Шу вақтгача ойига тушаётган қўшимча 10 млрд сўм қаерга кетган? Бу энди бошқа материалимиз мавзуси.