Санэпидемқўмита раиси биринчи ўринбосари Нурмат Атабековнинг таъкидлашича, аслида мазкур штамм аниқланганига анча бўлган ва у бир хил тезликда тарқалмаслиги билан характерланади. Шу боис бу мутацияга 17 йилгача “уйқуга кетиши” мумкин бўлган ва узоқ муддат борлигини сездирмайдиган ҳашарот – цикада номи берилган.

“Қолаверса, янги штамм бошқаларига нисбатан хавфлироқ эканига доир етарли далиллар мавжуд эмас.

Дастлабки ўрганишларга кўра, “Цикада” штамми “Омикрон”га хос, ўхшаш клиник белгилар билан кечади. У нафас йўллари жароҳатланиши, яъни бурун битиши, йўтал, томоқда оғриқ, қизариш, баъзан ҳид ва таъм билмаслик каби аломатлар билан намоён бўлиши мумкин”, – дейди Атабеков.

Мутахассислар унга катталарга нисбатан болалар кўпроқ чалинаётганини айтишмоқда. Бу қуйидаги омил билан боғлиқ.

Қайд этилишича, пандемия даврида дунё аҳолисининг катта қисми COVID-19 га қарши эмланди ва шу туфайли уларнинг қайтадан бу касалликка чалиниш эҳтимоли жуда кам. Аммо аввал коронавирус билан рўбарў келмаган, яъни организмида ҳали хасталикка қарши антитаначалар шаклланмаган болаларнинг бу вирусни юқтириш хавфи мавжуд.

Сурункали касаллиги бор, нафас йўллари хасталикларидан азият чекувчилар, иммунитети заиф ва ёши катта инсонлар ҳам бу хавфдан етарли даражада ҳимояланмаган.

“Албатта, вирус ўчоқлари аниқланган ҳудудларда бўлиб қайтган одамлар билан имкон қадар мулоқотни чеклашни тавсия қиламиз. Бироқ “Цикада” эпидемия ёки пандемияни келтириб чиқаради, деган фикрдан узоқмиз.

Ўзбекистон мисолида айтадиган бўлсак, мамлакатимизда эпидемиологик вазият барқарор. Аҳолида коронавирус штаммига нисбатан оддий респиратор касалликларга бўлгани сингари муносабат аллақачон шаклланган. Негаки, юртдошларимизнинг қарийб 80 фоизида жамоавий иммунитет вужудга келган.

Шу маънода, хавотирланиш учун ҳеч қандай асос йўқ”, – деди мутахассис .