Саида Мирзиёева гиёҳванд моддалар савдосига қарши жиддий кураш эълон қилинганини маълум қилди

Президент Администрацияси раҳбари Саида Мирзиёева мамлакат куч тузилмалари раҳбарлари билан ишчи йиғилиш ўтказди. Унда наркожиноятчилик, жиноий гуруҳлар ва ноқонуний қурол-яроғ айланмасига қарши курашиш бўйича мувофиқлаштирилган самарали тизимни қисқа муддатда яратиш вазифаси қўйилди.

"Қатъий ва доимий назоратни талаб қиладиган яна бир муҳим масала - гиёҳванд моддалар савдоси ва уюшган жиноятчиликка қарши курашиш.

Бугун Президент Администрациясида куч тузилмалари раҳбарлари билан ишчи йиғилиш ўтказилди. Наркожиноятчилик, жиноий гуруҳлар ва ноқонуний қурол-яроғ айланмасига қарши курашиш бўйича мувофиқлаштирилган самарали тизимни қисқа муддатда яратиш вазифаси қўйилди.

Жамиятда, биринчи навбатда ёшлар орасида гиёҳванд моддаларнинг тарқалишига йўл қўймаслик, ёш авлодни гиёҳвандлик балосидан асраш ва фуқаролар хавфсизлигини таъминлаш давлатнинг бевосита бурчидир. Бу йўналишдаги ҳар қандай ноқонуний хатти-ҳаракатларга қатъий равишда чек қўйилиши шарт" деб ёзди Президент Администрацияси раҳбари Саида Мирзиёева .