Пенсионерларга банк картаси очишда Face-ID талаб этилади
Марказий банкнинг ID-11756-сонли лойиҳасига кўра, пенсионерларга банк картасини расмийлаштиришда шахсини Face-ID орқали биометрик идентификация қилиш талаби жорий этилмоқда.
Амалдаги тартибга кўра, Марказий банкда 3294-сон билан рўйхатдан ўтказилган низомнинг 11-банди банкларга жисмоний ва юридик шахсларга, шунингдек, 14 ёшдан 18 ёшгача бўлган фуқароларга ариза асосида банк карталарини бериш имконини беради. Бунинг учун тегишли шартнома тузилиши ёки оферта қабул қилиниши ҳамда шахс белгиланган тартибда идентификация қилиниши лозим.
Мазкур бандда пенсионерлар учун айнан Face-ID орқали шахсни тасдиқлаш талаби алоҳида кўрсатилмаган.
Янги лойиҳада эса пенсионерларга банк картасини очишда биометрик идентификациядан ўтиш шарти киритилмоқда. Демак, таклиф қабул қилинса, пенсионер банк картасини расмийлаштириш учун мурожаат қилганда шахсини Face-ID орқали тасдиқлаши талаб этилади.
Ушбу ўзгариш Президентнинг 2026 йил 28 сентябрдаги ПҚ–355-сон қарори билан ҳам боғлиқ. Қарорнинг 9-бандида 2026 йил 1 ноябрдан бошлаб пенсионерларга банк карталарини очиш билан боғлиқ хизматларни Face-ID орқали кўрсатиш тартибини жорий этиш Марказий банк зиммасига юклатилган.
Шунингдек, 14 ёшдан 18 ёшгача бўлган фуқароларнинг мустақил равишда банк картаси очиш ҳуқуқи ҳам янги таклиф эмас. Бу имконият 2025 йил 11 ноябрда рўйхатдан ўтказилган 3294-3-сонли ўзгартириш билан белгиланган. Бундан ташқари, 14 ёшга тўлмаган болаларга ҳам ота-онаси ёки қонуний вакилининг ёзма розилиги ва аризаси асосида банк картаси расмийлаштириш мумкин.
Ҳозирча мазкур ҳужжат ўзгартириш лойиҳаси ҳисобланади. Унинг якуний таҳрири тасдиқлангандан кейингина тегишли тартиб ҳуқуқий кучга эга бўлади.
