1961 йил 12 март санаси қорақалпоқ қизлари жасорати тарихида ёрқин саҳифа сифатида муҳрланиб қолган.

Ана шу куни ёш талаба – Шаригул Юсупбоева 800 метр баландликдан парашют билан сакраб, довюраклигини намойиш қилган илк қорақалпоқ қизларидан бири сифатида тарихга кирди.

Талабалик йиллари унинг тақдирида кутилмаган бурилиш ясади.

Россиялик дугонаси Шура Селезнёва билан бирга ДОСААФнинг парашютчилар тўгарагини танлади. Буни қарангки, саралаб олинган 9 нафар ёшлар орасида Шаригул ҳам бор эди.

1961 йилнинг 12 март куни.
Дала майдони. Осмон мусаффо, шамол енгил эсарди. «Ан-2» самолёти секинлик билан ердан узилиб, кўм-кўк осмон сари кўтарилди. 800 метр баландлик – ҳар қандай инсон учун жиддий синов. Ҳаяжонли лаҳзалар... Самолёт эшиги очилди ва бир неча сониялардан кейин осмон бағрида оппоқ парашют пайдо бўлди. Шу онда Шаригул Юсупбоева номи жасорат рамзига айланди.

Илк сакраш унинг хотирасида умрбод сақланиб қолди. Парашютчилар саҳрога қўнишади. Айримлари дарахтларга илиниб қолади, кимидир сувга тушиб, қолиб кетади. Шаригул эса манзилга иккинчи бўлиб тушади.

– Кенг далага тушдик. Ҳамма мени табриклаяпти. Мен ҳам ўзимда йўқ хурсанд эдим. Бир пайт қошимга бир йигит келиб, қаердан келганимни сўради. Мен «Қорақалпоқданман», деб жавоб бердим. Йигит Қорақалпоғистон ҳақида тасаввурга эга эмас экан. Унинг қаерда жойлашганини сўради. Шунда ҳазил аралаш дедим:

– Консерва еганмисиз,сазан балиқлари...?

– Ҳа, - деб кулди у.

– Ўша консерва бизда, Мўйноқ консерва заводида ишлаб чиқарилади, - дедим ва Орол ҳақида гапирдим. Шундан кейин эсига тушди, назримда,самимий суҳбат қурдик.

Орадан кўп вақт ўтмади. Амалиётда Чирчиқда эдик. Талабалардан бири ёнимга югуриб келди. Қўлида журнал.

– Табриклайман! Қара, сен ҳақингда мақола чиқибди! - деди у мени бағрига босиб.

Бир зумда атрофимга талабалар тўпланиб кетди. Ҳамма хурсанд эди.

Журнални қўлимга олиб қарасам, «Ўзбекистон хотин-қизлари» журнали экан. Шундан кейин менга турли бурчаклардан мактублар кела бошлади, - деб эслайди онахон ўша даврларни.
Бир пайтлар осмон сари қилинган парвоз эса бугун нафақат унинг ҳаёти, балки қорақалпоқ қизлари жасорати ҳақидаги гўзал бир ҳикоя сифатида тарихда сақланиб қолган.

Фотима Абдураимова
ishonch.uz