100 йилдан кейин ўғирланган ноёб пушти бриллиант яна намойишга қўйилди
Францияда 17 октябрь куни ноёб пушти бриллиант илк бор қарийб 100 йиллик танаффусдан сўнг жамоатчиликка намойиш этилди. У 1926 йил октябрь ойида ўғирланганидан бери омма олдида кўрсатилмаган эди.
«Гран Конде» (Grand Condé) деб аталувчи, нок шаклидаги 9,01 каратли қимматбаҳо тош Париж яқинидаги Шантийи қалъасига тунги ҳужум вақтида ўғирланган. Тажрибасиз ўғрилар бриллиантни ичи бўшатилган олма ичига яширишган.
Француз инқилоби даврида сақланиб қолган кам сонли қироллик қимматбаҳо тошларидан бири бўлган бу бриллиант бир неча ҳафтадан сўнг кутилмаган тарзда топилган.
Ўғрилар тўхтаган меҳмонхонадаги хизматкор аёл оч қолиб, хонада турган олмани тишлаганида, унинг ичидан қимматбаҳо тош чиққан.
Энди бриллиантни Шантийи қалъасидаги Конде музейида яна кўриш мумкин. «Пушти бриллиант» (Le Diamant Rose) деб номланган кўргазма 2027 йил 3 январга қадар давом этади.
Музей директори Матье Дельдикнинг таъкидлашича, олма билан боғлиқ воқеа ишонарсиз туюлиши мумкин, аммо ўша пайтда бу ҳақда матбуотда кенг ёзилган.
Журналистлар ундан кўргазма сўнгги бир йилда маданий бойликлар ўғирланиши, жумладан, 2025 йил октябрида Луврда содир этилган шов-шувли талончилик фонида тақдирни синашга ўхшамайдими, деб сўрашган.
Дельдик CNN телеканалига бриллиантнинг суғурта қийматини ошкор қилишдан бош тортди. Бироқ унинг сўзларига кўра, тош пухта илмий текширувдан ўтказилган ва энди уни бошқа қимматбаҳо тошлардан адаштирмасдан аниқ таниб олиш мумкин.
Конде музейи вакилларининг маълум қилишича, илмий таҳлил натижалари, шунингдек, бриллиант тарихи ва унинг ўғирланишига оид илгари эълон қилинмаган архив ҳужжатлари ҳам кўргазмадан ўрин олган.
