Ўзбекистон ва АҚШ 12 миллиард долларлик ҳамкорлик келишувларини имзолади

АҚШ делегациясининг Ўзбекистонга амалга оширган ташрифи доирасида икки мамлакат ўртасидаги иқтисодий ва технологик алоқаларни янги босқичга олиб чиқувчи муҳим келишувларга эришилди. Ташриф давомида ўтказилган бизнес тадбирлари якунида умумий қиймати 12 миллиард АҚШ долларига тенг бўлган 54 та битим имзоланди.
Ушбу кенг кўламли келишувлар савдо, инвестиция, саноат ва ижтимоий соҳаларни қамраб олган бўлиб, мамлакатимиз иқтисодиётини модернизация қилишга хизмат қилади.
Ҳамкорликнинг асосий йўналишлари ва кутилаётган ўзгаришлар Ўзбекистон иқтисодиётининг энг муҳим тармоқларини ривожлантиришга қаратилган. Жумладан, GE Aerospace компанияси билан ҳамкорликда Uzbekistan Airways миллий авиакомпаниясининг янги самолётлари учун замонавий двигателлар етказиб берилади. Wabtec компанияси билан эса темир йўл техникаси ва эҳтиёт қисмларини мамлакатимизда ишлаб чиқариш йўлга қўйилади.
Дунёнинг етакчи молия гигантлари — Franklin Templeton, Oppenheimer & Co., Citigroup ва BlackRock билан тузилган битимлар Ўзбекистон компанияларига халқаро капитал бозорларига чиқиш, хорижий инвестицияларни жалб қилиш ва инфратузилма лойиҳаларини молиялаштириш имконини беради.
ReElement Technologies, Traxys ва Trafigura компаниялари билан биргаликда янги кон жойларини қидириш, ўрганиш ва технологик ҳамкорлик йўли билан муҳим минерал ресурсларни ўзлаштириш режалаштирилган.
Amazon Leo билан сунъий йўлдош алоқасини ривожлантириш, GE HealthCare билан замонавий тиббий технологияларни жорий этиш ҳамда Valmont Industries билан қишлоқ хўжалигига оид лойиҳалар амалга оширилади.
Имзоланган 12 миллиард долларлик ушбу келишувлар халқаро капитал ва илғор технологияларни Ўзбекистоннинг ишлаб чиқариш ва саноат салоҳияти билан бирлаштиришга хизмат қилади. Эндиликда энг асосий вазифа, ушбу келишувларни босқичма-босқич ва самарали равишда амалиётга татбиқ этиш ҳамда улардан кўзланган аниқ натижаларга эришишдан иборат.