Дастурга мувофиқ, болаларнинг 6 ёшли тайёрлов гуруҳларига қамрови қисқа муддатда 100 фоизга етказилади. Шу билан бирга, хусусий боғча ташкил қилиш учун амалдаги имтиёзлар сақлаб қолинади.

Президент барча мактабларни халқаро баҳолаш дастурлари билан тўлиқ қамраб олиш вазифасини ҳам белгилади.

Техникумларда эса халқаро таълим стандартлари жорий қилиниб, ёшларни юқори даромадли касбларга ўқитиш тизими йўлга қўйилади. Бу йўналишда қамровни 1 млн нафарга етказиш режалаштирилган.

— Янги Ўзбекистонда касб эгалламаган бирорта йигит-қиз қолмайди, — деди Президент.

Шунингдек, келгусида камида 10 та Ўзбекистон университетини дунёнинг TOP-1000 олий таълим муассасалари қаторига киритиш мақсад қилинган.

Давлат раҳбари нутқида сўнгги ўн йилда таълим тизимида амалга оширилган ишларга ҳам тўхталди.

Аҳоли сони 8 млн нафарга кўпайганига қарамай, мактабгача таълим қамрови 78 фоизга етказилган. Мактабларда 1,5 млн қўшимча ўқувчи ўрни яратилган. Президент, ижод ва ихтисослашган мактаблар ташкил этилган.

Олий таълим муассасаларида талабалар сони 1 млн 600 минг нафарга етган. Президент маълумотига кўра, талабаларнинг ярмидан кўпини хотин-қизлар ташкил этмоқда.

Мустақиллик байрамидаги нутқда таълим билан бир қаторда илм-фан, замонавий технологиялар ва инновациялар ҳам тараққиётнинг ҳал қилувчи омили сифатида белгиланди.

Хусусан, ахборот технологиялари, сунъий интеллект ва креатив иқтисодиётни ривожлантириш орқали 10 млн ёшни рақамли индустрия ва келажак касбларига жалб қилиш мақсад қилинган.