Чиқиндиларни бошқариш ва сиклли иқтисодиётни ривожлантириш агентлиги автомобилларни утилизация қилиш тизими бўйича ишлаб чиқилган қонун лойиҳаси қайта кўриб чиқилаётганини маълум қилди.

Дастлабки лойиҳада ишлаб чиқарилганига 30 йил ва ундан ортиқ вақт бўлган автомобиллар эгалари ҳар йили экологик компенсация тўлаши белгиланган эди. Мазкур таклиф жамоатчилик ва мутахассислар томонидан кенг муҳокама қилиниб, турли эътирозларга сабаб бўлди.

Натижада ушбу норма қонун лойиҳасидан бутунлай чиқариб ташланди.
Энди асосий эътибор эски автомобилларни мажбурий эмас, балки иқтисодий рағбат орқали янгилашга қаратилмоқда.

Таклиф қилинаётган тартибга кўра, фуқаролар эски автомобилларини махсус қабул қилиш корхоналарига топшириши мумкин. Автомобил бозор қиймати асосида баҳоланади ва эгасига шу қийматда пул ёки махсус ваучер тақдим этилади.

Бу ваучердан расмий дилерлар орқали янги автомобиль, жумладан, COBALT сотиб олишда бошланғич тўлов сифатида фойдаланиш имконияти яратилиши режалаштирилган. Қолган маблағни эса 2 йилдан 7 йилгача бўлган муддатда бўлиб-бўлиб тўлаш механизми ишлаб чиқилмоқда.

Агар фуқаро ваучердан фойдаланишни истамаса, унинг қийматини бир ой ичида нақд пул шаклида олиши мумкин бўлади.

Айни пайтда агентлик қонун лойиҳаси ҳали якуний қабул қилинмаганини, таклиф ва мулоҳазалар асосида янада такомиллаштирилишини маълум қилди.