Ушбу қонун билан Маъмурий жавобгарлик тўғрисидаги кодекс, шунингдек «Ички ишлар органлари тўғрисида», «Лицензиялаш, рухсат бериш ва хабардор қилиш тартиб-таомиллари тўғрисида» ҳамда «Қўриқлаш фаолияти тўғрисида»ги қонунларга тегишли ўзгартиш ва қўшимчалар киритилиши белгиланмоқда.

Янги тартибга кўра, айрим маъмурий ҳуқуқбузарлик ишларини кўриб чиқиш ваколати Ички ишлар вазирлиги ҳузуридаги Қўриқлаш департаменти масъул ходимларига берилади. Жумладан, жамоат жойларида тамаки маҳсулотларини истеъмол қилиш, ов ва балиқ овлаш қоидаларини бузиш, ҳайвонот дунёсидан фойдаланиш тартибларига риоя қилмаслик, шунингдек дарахт ва буталарни ноқонуний кесиш ёки шикастлантириш каби ҳолатлар шу тоифага киради.

Шу билан бирга, қонунларга киритилаётган ўзгартишлар асосида Миллий гвардиянинг Қўриқлаш бош бошқармаси қайта ташкил этилиб, Ички ишлар вазирлиги ҳузуридаги Қўриқлаш департаментига айлантирилди. Натижада, қўриқлаш соҳасидаги асосий вазифа ва ваколатлар ушбу тузилмага ўтказилди.

Бундан ташқари, лицензиялашга оид қонун ҳужжатларида ҳам янгиликлар кўзда тутилган. Энди алоҳида муҳим ва тоифаланган объектларда қўриқлаш техник воситаларини лойиҳалаштириш, ўрнатиш, таъмирлаш ва хизмат кўрсатишга рухсат бериш ваколати Миллий гвардиядан Ички ишлар вазирлигига ўтади. Шунингдек, мазкур фаолиятни бошлаш ёки тугатиш ҳақида Ички ишлар вазирлигини хабардор қилиш тартиби жорий этилади.