Эндиликда Uzbekistan airways самолётларида ҳам интернетдан фойдаланиш мумкин

“Uzbekistan airways” авиакомпанияси ўз авиапаркини янги авлод Аirbus А321neo самолёти билан тўлдирди. Ушбу лайнер Ўзбекистон мустақиллигининг 35 йиллиги муносабати билан олиб келинди.




Самолёт 172 нафар йўловчига мўлжалланган бўлиб, 16 та бизнес-класс ва 156 та эконом-класс ўриндиғи мавжуд.

Янги лайнернинг асосий янгиликларидан бири парвоз давомида интернетдан фойдаланиш имкониятидир. Эндиликда йўловчилар осмонда ҳам интернетга уланиб, хабар алмашиш, онлайн ишлаш ва бошқа рақамли хизматлардан фойдаланишлари мумкин.


Бундан ташқари, самолёт замонавий Аirspace Premium салони, қулай ўриндиқлар ва такомиллаштирилган мультимедиа тизими билан жиҳозланган. Ҳар бир йўловчи учун индивидуал экранлар ўрнатилган бўлиб, улар орқали фильмлар кўриш, мусиқа эшитиш, ўйинлар ўйнаш ва парвоз харитасидан фойдаланиш мумкин.


Янги Аirbus А321neo авиакомпаниянинг хизмат кўрсатиш сифатини янги босқичга олиб чиқишга хизмат қилади.






