Наврўз ва Рамазон ҳайити арафасида Тошкентдан ҳудудларга қўшимча автобуслар йўлга чиқади
Наврўз байрами ҳамда Рамазон ҳайити олдидан Тошкент шаҳридан республика ҳудудларига қўшимча автобус қатновлари йўлга қўйилади. Бу ҳақда Транспорт вазирлиги маълум қилди.
Қайд этилишича, Тошкент автовокзалидан мавжуд рейсларга қўшимча равишда ҳар куни шаҳарлараро йўналишларда 70 дан ортиқ қўшимча автобуслар ҳаракатланади.
Ушбу қатновлар Зомин, Самарқанд, Жарқўрғон, Бухоро, Қоракўл, Мирбозор, Навоий, Жўш, Нурота, Зармитан, Зарафшон, Хатирчи, Қизилтепа, Конимех, Учқудуқ, Кадан, Пайариқ, Шаҳрисабз, Қарши, Ғузор, Шеробод, Термиз, Денов, Узун, Урганч, Хива, Гурлан, Тўрткўл ва Нукус йўналишлари бўйлаб амалга оширилади.
Қатнов жадвали ва чипта нархлари билан автовокзалнинг расмий ижтимоий тармоқ саҳифалари орқали танишиш мумкин. Шунингдек, чипталарни автовокзал кассаларида ёки “UzBus” мобиль иловаси орқали онлайн харид қилиш имконияти мавжуд.
Байрам кунлари муносабати билан эълон қилинган қўшимча дам олиш кунларида аҳолининг ҳудудлараро ҳаракатланишига бўлган талабни тўлиқ қондириш мақсадида йўловчилар оқимига қараб қўшимча рейслар узлуксиз равишда ташкил этилади.
Шу билан бирга, жараёнларни самарали назорат қилиш учун Транспорт вазири топшириғи асосида вазирнинг биринчи ўринбосари раҳбарлигида Тошкент автовокзалида тезкор штаб фаолият юритмоқда.
Эслатиб ўтамиз, Рамазон ҳайити муносабати билан 20 март куни Тошкентда жамоат транспорти ҳаракати эрталаб соат 04:00 дан бошланиши аввал хабар қилинган эди.
Долзарб мавзулар
Mақолага баҳо беринг
0/50
0
0
0
0