Зеваржон Хўжаниёзова Хоразмнинг энг чекка ҳудудидаги оилавий шифокорлик пунктида ҳамшира бўлиб хизмат қилади. У муассасадан уч километр олисда жойлашган Амударё бўйларида тарқоқ яшовчи аҳолига ҳам патронаж хизмати кўрсатади. Бу ерга пиёда бориб келиши учун ярим кун вақти кетади.

Бошқа ҳамкасблари қатори унга ҳам скутер жуда қулай. Патронаж ҳамшира ҳар куни хонадонларда бўлиб, кексалар, ёш оналар, янги туғилган чақалоқлар ҳолидан хабар олади. Қишлоқ шароитида ички кўчаларда автобус юрмайди.

— 33 йилдан буён шу касбда фаолият кўрсатаман. Оилаларга эмлашнинг аҳамиятини доимо тушунтираман. Шунинг учун менинг ҳудудимда ҳамма болалар тўлиқ эмланади. Тиббий кўриклардан вақтида ўтиб туришади, — дейди Зеваржон опа.

Илгари “Оққум” маҳалласида оилавий шифокорлик пункти йўқ эди. Мана икки йилдирки, уч нафар шифокор ва йигирмадан зиёд ҳамширалар 10 минг 300 дан ортиқ аҳолига малакали тиббий хизмат кўрсатиб келмоқда. Муассаса тўлиқ рақамлаштирилди. Стационар бўлим ташкил қилинди. Маҳалланинг олис ҳудудида яшовчи аҳолига қулайлик яратиш мақсадида тиббиёт пункти фаолияти ҳам йўлга қўйилди.

Бугунгача олис ҳудудларда ишловчи юзлаб ҳамширалар скутерлардан фойдаланишарди. Қишлоқ хўжалигида ишловчи бошқа аёллар учун ҳам ушбу транспорт воситаси жуда қулай бўлиб келаётганди. Энди улар яна ўнлаб километр масофани пойи-пиёда босиб ўтишадими?
Қишлоқ ҳудудларида скутерлар йўл ҳаракатига халақит қилмайди. Масъуллар буни инобатга олишадими?..

Эслатиб ўтамиз, Вазирлар Маҳкамасининг 2024 йил 17 июлдаги 429-сон қарорига кўра, 2025 йилнинг 1 октябридан мопед ва скутерларни бошқариш учун «А» тоифали ҳайдовчилик гувоҳномасига эга бўлиш, мажбурий давлат рўйхатидан ўтказиш, давлат рақами белгиларини олиш керак.

Муҳаббат ТЎРАБОЕВА,
Ishonch.uz