Янги йил арафасида помидор ва бодринг нархи 100 минг сўмгача кўтарилгани ҳақида хабарлар тарқалмоқда. Ishonch.uz мухбири бу борада Тошкентдаги бир қанча бозорларда бўлиб вазиятни ўрганди.

Биринчи манзил – «Юнусобод деҳқон бозори». Бу ерда бодринг 40-45, помидор эса 25-30 минг сўмдан сотилаётганига гувоҳ бўлдик.

Шу кунларда нега айнан бодринг қимматлашиб кетгани, бу сабзавот қаердан олиб келинаётганига қизиқдик.

Мавзуга доир: Бодринг нархлари нега кескин кўтарилди? Мутахассис жавоб беради

Савдогарларнинг айтишича, бодринг асосан Бухоро, Самарқанд вилоятидан олиб келинмоқда. Айрим сотувчилар эса мазкур маҳсулотни «Қўйлиқ деҳқон бозори»дан, 1 килосини 37 минг сўмдан олиб келиб, устига озроқ нарх қўшиб сотмоқда.

Энг қиммат саналган «Олой деҳқон бозори»да бодринг 70-85 минг сўм бўлса, помидор 35-45 минг сўмдан сотилмоқда.
Сотувчиларнинг изоҳ беришича, байрам кунлари унинг нархи яна кўтарилиши мумкин.

– Бодринг Ўзбекистонда кам, ўзимиз ҳам қимматга оляпмиз. Ҳа айтганча, ҳозир олиб қолинг, байрам куни нархи икки баробарга кўтарилади, – дейди сотувчи.

Ishonch.uz бозорларни кузатишда давом этади. Кўрамиз, янги йил арафасида нарх бўйича одамларни лол қолдирадиган навбатдаги маҳсулот қайси бўлар экан?

Мадина ПЎЛАТ қизи