Марҳумнинг турмуш ўртоғи — Урганч тумани “Қоромон” қишлоғида истиқомат қилувчи Гавҳар Жабборова 2021 йилда пенсия ёшига етди. Қонунчиликка мувофиқ, у боқувчисини йўқотган меҳнатга лаёқатсиз шахс сифатида зарар пули олиш ҳуқуқига эга. Бироқ тўрт йил давомида унга белгиланган тўловлар амалга оширилмади. “Ҳудудгаз Хоразм” мутасаддилари марҳумнинг қариндошларига бир йўла тўланадиган нафақа тўлаб берилганини, бошқа кўмак берилмаслигини айтишди.

Шундан сўнг, Гавҳар Жабборова Ўзбекистон касаба уюшмалари Федерацияси Хоразм вилояти кенгашига оғзаки мурожаат қилиб, ҳуқуқий ёрдам сўради. Мурожаат асосида фуқаролик ишлари бўйича Урганч туманлараро судига даъво аризаси киритилди.

Суд даъвони кўриб чиқиб, мавжуд далилларга ҳуқуқий баҳо берди ва даъвогар фойдасига қарор чиқарди. Суд қароригa асосан, “Ҳудудгаз Хоразм” газ таъминоти филиали томонидан Г.Жабборовага боқувчисининг вафоти муносабати билан ойма ой тўланиши лозим бўлган пул миқдори ҳисобланиб, ўтган давр учун 20 миллион 482 минг 500 сўм зарар пули ундириб берилди. Шунингдек, унга ҳар ойда энг кам иш ҳақининг 50 фоизи миқдорида доимий тўлов тайинланди.

Гавҳар опа тўрт йилда адолат қарор топиб, ҳақ-ҳуқуқи тикланганидан мамнун.

Эркинбой БАЙЖАНОВ,
Ўзбекистон касаба уюшмалари Федерацияси
Хоразм вилоят кенгашининг меҳнат техник инспектори