Дастурчиларга информатика муҳимроқ эмасми?

2022 йили талаба бўлдим. Абитуриентлик вақтимда имтиҳон топшириладиган фанлар мажмуасида «Ахборот технологиялари» соҳасидаги йўналишлар («Компьютер илмлари ва дастурлаш технологиялари», «Ахборот тизимлари ва технологиялари», «Ахборот хавфсизлиги», «Компьютер инженеринги», «Дастурий инженеринг», «Сунъий интеллект» ва б.)га ҳам худди техника соҳасидаги йўналишларлар каби математика ва физика фанларидан имтиҳон бўлишини билиб, ҳайрон қолгандим. Очиғи, бунга ҳозир ҳам тушунмайман. Тўғри, техника соҳасида муҳандислар етишиб чиқади.

136 11:20 | 09.07.2025 11:20

Муҳандисларга эса, физика муҳим. Лекин асосан дастурчилар тайёрлайдиган ТАТУ (Тошкент ахборот технологиялари университети) ва унинг филиалларида юқорида саналган таълим йўналишларига физика фанидан имтиҳон бўлиши нотўғри деб ўйлайман. Математика ва физикадан яхши тайёрланиб дастурчиликка ўқишга кирган талаба ўқишни бошлади дейлик. Лекин унинг на дастурчиликдан, на информатикадан хабари бор. Бунда унинг айби йўқ. Чунки ундан математика ва физика талаб қилинган. У энди дастурлашни нолдан ўрганишни бошлайди. Агар кириш имтиҳонларида информатикадан тест олинса, ҳеч бўлмаганда талаба назарий билимга эга бўлади ва ўқиш бошлангач, қийналмайди.

Менинг таклифим, «Ахборот технологиялари» соҳасига биринчи фан сифатида информатика, иккинчи фан сифатида эса математикадан тест олинса. Шунда мантиқан ҳам тўғрироқ бўлади. Таълим соҳасида жуда кўп ижобий ўзгаришлар бўлмоқда. Масалан, 2023 йилги кириш имтиҳонларида юридик соҳалар учун тарих ва чет тили фанлари ҳуқуқ ва чет тили фанларига ўзгартирилган эди. Бу кўпчиликни қувонтирганди. Умид қиламанки, менинг ҳам таклифим инобатга олинади. Бу ахборот технологиялари йўналишида тушунчага, билимга эга ёшларнинг олий таълим олиш имкониятларини кенгайтиради, пировардида соҳанинг янада ривожланишига хизмат қилади.