Тахминан 1,3 миллион обуначиси бўлган ўзбек блогери Россиядан чиқиб кетишга уринаётганда Москва халқаро аэропортларидан бирида полиция томонидан ушланган.

Россия Ички ишлар вазирлиги Жасжан яъни Жасур Шодиев вирусли контент яратиш учун атайин Москвага учиб келганини, нашр қилинган видеоларда у нотаниш одамларга яқинлашгани, можаро қўзғагани ва баъзи ҳолларда кутилмаганда аёл йўловчиларнинг тиззаларига бошини қўйиб, жанжалга сабаб бўлгани ҳақида маълумот берди.

Бундан ташқари, видеолардан бирида блогер кекса йўловчининг сумкасидан газетани тортиб олган. Бу ҳаракатларнинг барчаси видеога олинган ва кейинчалик аудиторияни жалб қилиш, кўришларни кўпайтириш ва контентдан даромад олиш учун интернетга жойлаштирилган.

Россия Ички ишлар вазирлигининг расмий вакили Ирина Волкнинг сўзларига кўра, полиция интернетни кузатиб видеоларни аниқлаган. Жиноятчининг шахси аниқлангандан сўнг, у мамлакатдан чиқиб кетмоқчи бўлган пайтда, Внуково аеропортида ҳибсга олинган.

Сўроқ пайтида блогер янги аудиторияни жалб қилиш учун шундай контент яратаётганини маълум қилган. У бундай хатти-ҳаракатлар жамоат тартибини бузиши мумкинлигини билмаганлигини даъво қилди. Ҳибсга олингандан сўнг, эркак узр сўради.

Унга Россия Маъмурий ҳуқуқбузарликлар кодексининг 20.1-моддаси ("Майда безорилик") бўйича маъмурий баённома тузилди. Тергов ҳозирда давом этмоқда ва унинг натижаларига кўра просессуал қарор қабул қилинади.