Қонун билан Жиноят кодексига “коррупцияга оид жиноятлар” атамаси киритилиб, ушбу тоифага мансуб ҳуқуқбузарликларнинг аниқ рўйхати белгиланмоқда. Бу эса қонунчиликдаги тушунмовчиликларни бартараф этишга хизмат қилиши таъкидланди.

Шунингдек, хизмат мавқеидан фойдаланиб содир этилган фирибгарлик учун жавобгарлик ҳам кучайтирилди. Эндиликда мазкур жиноят учун энг юқори жазо муддати 8 йилдан 10 йилгача озодликдан маҳрум қилишни ташкил этади.

Қонун билан нодавлат ва хусусий ташкилотлар ходимларини пора орқали оғдириб олиш билан боғлиқ жиноятлар учун ҳам қатъийроқ жавобгарлик белгиланмоқда.

Бундан ташқари, Жиноят кодексининг бир қатор моддаларига “ғаразгўйлик ниятларида содир этиш” ҳолати жазони оғирлаштирувчи алоҳида белги сифатида киритилмоқда.

Ҳужжатда давлат молияси ва давлат харидлари соҳасидаги қонунбузилишлар учун маъмурий жазоларни кучайтириш, шунингдек, давлат бошқаруви тизимида вазифалар такрорланишининг олдини олишга қаратилган ўзгартишлар ҳам назарда тутилган.

Сенаторлар фикрича, мазкур қонун коррупция ва бошқа мансабдорлик жиноятларига қарши курашиш самарадорлигини ошириш, шунингдек, жазо муқаррарлигини таъминлашга хизмат қилади.