Ҳолат юзасидан Фавқулодда вазиятлар вазирлигининг муносабати эълон қилинди. Унда келтирилишича, 7 март куни соат 10:30 атрофида Косон тумани «Янгиобод» маҳалласидаги Майманоқ–Косон чорраҳасида ҳаракатланмай турган «Damas» русумли автомашинага ўрнатилган сиқилган газ баллони техник носозлик сабаб чақнаган.

Ҳодиса оқибатида ҳеч ким тан жароҳати олмагани, ёнғин ҳам келиб чиқмаганини маълум қилган вазирлик бошқа шахсларга етказилган моддий зарарларни очиқламаган.

"Ishonch.uz" мухбири воқеа жойига бориб, ҳолатни ўрганди. "Damas" русумли автомобилнинг газ баллони портлаши натижасида яқин атрофда ҳаркатланмай турган "Nexia 3","Nexia 2" ва "Nexia 1" русумли 3 та автомобил шикастланган.

"Nexia 2" русумли автомашинанинг ҳайдовчиси, деҳқон бозорига озиқ-овқат харид қилгани келганини, автоуловини йўл четига қўйганини, портлаш овози баланд чиққанини таъкидларкан, ҳар бир ҳайдовчи машинасини техник ҳолатини яхши сақлаши лозимлигини эслатиб ўтди.

Косон туман тиббиёт бирлашмаси масъуллари ҳолат юзасидан ҳеч бир фуқарога тан жароҳати етмагани, ушбу ҳолат юзасидан муассасага шошилинч мурожаатлар келиб тушмаганини маълум қилди.

Айни пайтда ҳолат юзасидан Косон туман ИИБ томонидан терговга қадар суриштирув ишлари олиб борилмоқда.

Баҳодир ҲАЛИМОВ,
“Ishonch.uz”