Маълумотларга кўра, Fox телеканали 2026 йилги Жаҳон чемпионатини АҚШ ҳудудида трансляция қилиш ҳуқуқлари учун 485 миллион доллар тўлаган. Шу билан бирга, The New York Times ушбу ҳуқуқларнинг бозор қийматини 1–1,5 миллиард доллар деб баҳолаган. Шу нуқтаи назардан қараганда, сув ичиш танаффуслари Fox учун сарфланган маблағни қоплашнинг муҳим воситасига айланмоқда.

FIFA Вашингтонда ўтказилган Халқаро телерадиоэшиттирувчилар йиғинида 2026 йилги Жаҳон чемпионатининг барча 104 та учрашувида, ҳар бир бўлим ўртасида мажбурий уч дақиқалик танаффуслар жорий этилишини маълум қилди. Бу танаффуслар фақат иссиқ об-ҳавода эмас, балки ёпиқ томли ва иқлим назоратига эга стадионлардаги ўйинларда ҳам амал қилади.

FIFA қарор мураббийлар ва трансляторлар билан маслаҳатлашувлардан кейин қабул қилинганини таъкидлади.
Орадан бир неча ой ўтгач, FIFA телетрансляторларга ушбу танаффуслар вақтида реклама сотишга расман рухсат берди.

Белгиланган тартибга кўра, ҳар бир танаффусда Fox реклама учун 2 дақиқа 10 сониялик эфир вақтига эга бўлади. Реклама танаффуси ҳуштак чалингандан 20 сония ўтгач бошланади ва ўйин қайта тикланишидан 30 сония олдин якунланади.
Барча 104 та учрашув ҳисобга олинганда, бу футбол тарихида аввал мавжуд бўлмаган 832 та янги реклама жойлаштириш имкониятини яратади. Fox ва Telemundo телеканаллари ушбу чемпионат давомида реклама орқали умумий ҳисобда 850 миллион доллар даромад олишни прогноз қилмоқда.

Албатта, футболчилар саломатлиги ҳақидаги хавотирлар ҳам асоссиз эмас. Аргентина терма жамоаси ярим ҳимоячиси Энсо Фернандес ўтган ёзда АҚШда бўлиб ўтган Клублар ўртасидаги жаҳон чемпионатида юқори ҳарорат туфайли ўзини боши айланганини ва вазият «жуда хавфли» бўлганини айтган эди. Айрим учрашувлар вақтида ҳаво ҳарорати Фаренгейт шкаласи бўйича 100 даражага яқинлашган.

Шу боис FIFA муайян чора кўриши учун етарли асосларга эга эди. Бироқ ташкилот бу танаффусларни об-ҳаво шароитидан қатъи назар барча ўйинларга татбиқ этди ва шу билан бирга трансляторлар учун янги коммерциявий имкониятлар яратди. Натижада 2026 йилги Жаҳон чемпионати тарихдаги энг «рекламабоп» мундиаллардан бирига айланиши мумкин.

Fox бу ҳолатни чемпионатнинг илк кунидаёқ тасдиқлаб қўйди. Мексика ва Жанубий Африка ўртасидаги очилиш учрашувида телеканал FIFA белгилаган 30 сониялик қайтиш ойнасига риоя қила олмади. Трансляция реклама блокидан қайтганида тўп аллақачон ўйинга киритилган эди.

Қизиғи шундаки, ўнлаб йиллардан бери FIFAнинг глобал ҳамкори ҳисобланган Coca-Cola майдондаги сув ичиш нуқталарини ҳам бошқаради. Шу тариқа, бир қарашда футболчилар эҳтиёжлари учун ажратилган уч дақиқалик танаффус бир вақтнинг ўзида учта тижорий манфаатга хизмат қилмоқда: майдон ҳомийси Coca-Cola, реклама даромадлари ортидан фойда кўрувчи Fox ва унинг стриминг платформалари обуначилари.

2030 йилги Жаҳон чемпионати Испания, Португалия ва Марокашда, 2034 йилги мусобақа эса Саудия Арабистонида ўтказилади. Ҳар икки минтақа ҳам ёз ойларида юқори ҳарорат билан ажралиб туради.