Дастлаб, “Ҳарбий хизматчиларнинг (ходимларнинг) ва улар оила аъзоларининг давлат пенсия таъминоти тўғрисида”ги Қонун кўриб чиқилди.

Мазкур жараёнда хизмат йиллари учун пенсия, ногиронлик пенсияси, боқувчисини йўқотганлик пенсияси, шунингдек пенсияларни ҳисоблаш, тайинлаш, қайта ҳисоблаш ва тўлаш тартиблари аниқ белгилаш чоралари кўрилди.

Шунингдек, “Ёнғин хавфсизлиги тизими такомиллаштирилаётганлиги муносабати билан Ўзбекистон Республикасининг айрим қонун ҳужжатларига қўшимча ва ўзгартишлар киритиш тўғрисида”ги Қонун муҳокама қилинди. Сўзга чиққанлар томонидан 2025 йилда республикамизда юз берган 11 241 та ёнғин оқибатида 129 нафар фуқаро турли даражада жароҳат олган ва 82 нафар фуқаро ҳаётдан кўз юмгани билдирилди. Ўз навбатида, ёнғинларнинг олдини олиш бўйича замонавий ва таъсирчан механизмларни жорий этиш, шунингдек барча субъектларнинг бу борадаги масъулиятини ошириш тадбирлари белигланаётгани маълум қилинди.

Янги таҳрирдаги “Хавфли ишлаб чиқариш обектларининг ва потенциал хавфли объектларнинг саноат хавфсизлиги тўғрисида”ги Қонунни кўриб чиқиш давомида эса лифтлар, эскалаторлар, аттракционлар, юк кўтариш механизмлари, хавфли юк ташиш сиғимлари ҳамда шамол электр станциялари каби объектлар ҳуқуқий жиҳатдан қамраб олинаётгани аён бўлди.