Нафақат Осиёдан, балки МДҲдан ҳам вакил бўлиб Жаҳон чемпионатига чиққан Ўзбекистон терма жамоаси бугунги илк учрашувда ёмон ўйнамади. 3:1 бу имкониятларимиз паст дегани эмас. Йигитларимиз ҳам дунёнинг илғор жамоаларига муносиб қаршилик қила олиши мумкинлигини кўрсатди. Бироз тажриба, тактика ва маҳорат етишмади жамоамизга. Аммо Колумбия билан бўлган ўйингина эмас, чемпионатдаги барча учрашувлар Миллий терма жамоамизга катта тажриба, юксак марралар сари пиллапоя бўлади. Хатолар устида албатта жиддий ишланиши шубҳасиз. Ўйинни бутун оиламиз билан гоҳ ҳаяжон, қийқириқ, қувонч, гоҳ ички изтироб, ички типирчилашга ўхшаш ҳислар қуршовида томоша қилдик. Мехико стадионидаги йигитлар билан қалбан бирга бўлдик. Ахир бу Жаҳон чемпионати. Ахир бу Ўзбекистон! Учинчи ренессанс деган гаплар бекор эмас экан. Ана, шахматда бир гуруҳ вундеркиндларимиз юксак чўққиларни забт этиб келяпти. Фақатгина Жавоҳир эмас, унинг ортида Нодирбек, Шамсиддин, Афрўза каби Жаҳон аренасида ўзбек гени яна уйғонаётганини кўрсатаётган ёшлар бор. Бугун эса футболда йигитларимиз ўсаётганини кўраяпмиз. Ҳали бу катта йўлнинг бошланиши, юксак марралар олдинда. Келгусида албатта муносиб натижалар ҳам бўлади. Энг муҳими, жаҳон майдонидаги ҳар бир иштирок, ҳар бир қадам ва ҳар бир натижа қандай бўлишидан қатъий назар, биз Миллий терма жамоамиз билан биргамиз! Олға йигитлар, олға Ўзбекистон! Сиз бизнинг фахримизсиз!

Зебо Намозова
Ishonch.uz