«Аввалига битта таблетка етарди. Кейин эса тўрттасини ичсам ҳам таъсир қилмай қолди. Бир ярим ой ичида психотроп моддаларга 30 минг доллар ва 32 грамм тилламни сарфлаб юбордим. Охири эса қамоққа тушдим. Бугун ортга назар ташласам, йўқотганларим топганларимдан минг карра кўп экан...»

Бу сўзлар айни пайтда жазони ижро этиш муассасасида жазо ўтаётган ёш аёлга тегишли. Унинг ҳикояси нафақат бир инсон тақдири, балки ёшлар орасида психотроп моддаларга қарамлик қандай оғир оқибатларга олиб келиши мумкинлигини ҳам кўрсатади.

Ishonch.uz мухбири Зангиота туманидаги 21-сон жазони ижро этиш колониясида жазо ўтаётган маҳкума билан суҳбатлашди.

Унинг сўзларига кўра, қаҳрамоннинг болалиги осон кечмаган. Онаси узоқ йиллар хорижда меҳнат қилган, акаси қамалган, кейинчалик турмуш ўртоғи ҳам озодликдан маҳрум этилган. Маҳкуманинг таъкидлашича, айнан шу оилавий муҳит уни кўча ҳаётига яқинлаштирган.

У бугунги кунда қилган хатоларидан қаттиқ афсусланаётганини, энг оғир йўқотиши фарзанди экани ва яна яқинларининг ишончини йўқотганини айтди.

Феруза РАҲИМОВА,
Мирнодир МИРАКМАЛОВ
Ishonch.uz