Дунёда ҳеч нарса мамлакатни санъатчалик оламга жозибали танита олмайди. Ўзбекистоннинг бой тарихий-маданий меросини ўрганиш, оммалаштириш ва дунёга тараннум қилишда эса, санъатшунос олима Галина Анатолевна Пугаченкованинг ҳиссаси салмоқли.

Бу инсон нафақат юртимизда, балки бутун дунёда машҳур бўлган таниқли академик. ЮНEСКО ҳалқаро ташкилоти Галина Пугаченковани замонамизнинг таниқли аёл олими сифатида тан олган бўлса, Франция ҳуқумати олиманинг икки давлатни жаҳон санъати дурдоналари билан таништириш ҳамда фан, таълим соҳаларини ривожланишида салмоқли ҳисса қўшгани учун «Академик Пальма» нуфузли кўкрак нишони билан тақдирлаган.

2018 йилда Алерте Ҳеритаже нодавлат халқаро ассоциацияси, Марказий Осиё маданий мероси обсерваторияси, Голландия князь-клаус фонди, Америка Уайтинг жамғармаси ва Швейцариянинг Ўзбекистондаги элчихонаси кўмагида Галина Пугаченкованинг шахсий архив ҳужжатлари унинг ўғлидан сотиб олинган ва очиқ архив веб сайти яратилган.

Шу йилнинг 26 октябр куни олиманинг ана ўша шахсий архив ҳужжатларини Ўзбекистон Миллий архиви сақловига топшириш тадбири бўлиб ўтди. Энди бу ҳужжатлар мамлакатимиз архивида сақланиши тадбир қатнашчилари учун қувонарли янгилик бўлди.

Академикнинг шахсий архиви 1986 йилдан бошлаб шакллланган, мазкур ҳужжатлар бир неча йиллар давомида олим тарафидан тўлдириб борилган.

Миллий архивнинг ахборот хизмати тақдим қилган маълумотларга кўра, мазкур асл ҳужжатлар олима томонидан 336 та йиғма жилдга тизимлаштирилган, уларнинг ичида қўлёзма ва машини асосида ёзилган матнлар, олиманинг илмий ишлари, археологик тадқиқот дафтарлари, расмий ва шахсий ёзишмалар, аннотациялар, биографик қайдлар, фото суратлар, негативлар, чизма, харита, расм ва мой бўёқли суратлар жамланган.

Миллий архивда ушбу ҳужжатлар Марказий Осиё тарихини тадқиқ этган таниқли археолог, Галина Пугаченкованинг турмуш ўртоғи Михаил Евгеневич Массоннинг оилавий шахсий фонди ҳужжатлари билан бирлаштирилади.

Мафтуна Каримова,
Ishonch.uz