“Давлат кадастрлари палатаси фаолиятининг 7 ойлик ҳисоботи” мавзусидаги матбуот анжумани ўтказилди. Унда Ishonch.uz мухбири мутасаддиларга қуйидаги савол билан юзланди: "Кадастр соҳасида ходимлар, штат бирликлари етарлими? Чунки иш ҳажми, юклама жуда катта".

Кадастрлар палатаси раисининг биринчи ўринбосари Нозимжон Иномовга кўра, бундан муаммо мавжуд. Бўлим бошлиғи Санжар Абдурозиқовнинг изоҳ беришича, Вазирлар Маҳкамаси ташкилотга шартнома асосида ишчилар жалб этиш имкониятини берган ва шу асосда муаммо ҳал этилиши йўллари изланмоқда.

Шунингдек, Жорий йил 7 ойи давомида давлат раҳбари ҳамда ҳукуматнинг ер муносабатлари юзасидан тасдиқланган қарор ва Фармойишларига асосан республика бўйича жами 48,2 минг гектар қишлоқ хўжалиги тоифасидаги ер майдонлари тоифаси ўзгартирилди.

Жумладан, 18,56 минг гектари саноат фондига, 0,61 минг гектари аҳоли пунктларинг ерлари фондига, 2,5 гектари Тарихий-маданий аҳамиятга молик ерлар фондига, 1,0 минг гектари Табиатни муҳофаза қилишга мўлжалланган ерлар фондига, 0,19 гектари Ўрмон фонди ерларига, 27,84 минг гектари Сув фонди ерларига ўтказилди ҳамда белгиланган тартибда ер ҳисоботларига ўзгартиришлар киритилган.

2024-2025 йиллар давомида юртимиз бўйлаб 3 878 та маҳаллалар хатлов режасига киритилган бўлса, шулардан айни кунларда хатлов ўтказилаётган маҳаллалар сони 1 766 тани ташкил этмоқда. Хатлов ишларига 4,5 мингдан ортиқ кадастр мутаҳассислари жалб қилинган бўлиб, 2025 йил 1 август ҳолатига 534 956 та объектлар хатловдан ўтказилди. Кадастрлар палатаси томонидан аҳолига 17 турдаги хизматлар кўрсатилиб келинмоқда.

Кўчмас мулкларни давлат рўйхатидан ўтказиш учун 1 119,5 мингта мурожаат келиб тушган бўлиб, шундан, ижобий якунланганлари 626,7 мингта (56,0%), жараёнда 70,4 мингта (6,3%), рад этилганлар 422,4 мингта (37,7%) ни ташкил этади.