Вазирликнинг WeChat платформасида эълон қилинган баёнотида таъкидланишича, Хитой атрофидаги денгизларда кўзга кўринмас “махфий уруш” давом этмоқда. Иддао қилинишича, хорижий ташкилотлар замонавий кузатув воситалари ёрдамида махфий маълумотларни йиғиб, сув ости муҳитининг батафсил хариталарини шакллантирмоқда.

Расмийларга кўра, жосуслик фаолиятида “жосус тошбақалар” ва “жосус балиқлар” деб аталган йирик денгиз ҳайвонларидан ҳам фойдаланилган. Уларнинг билдиришича, Хитой сув ҳудудларида ҳаракатланаётган айрим ҳайвонларда махсус сенсорлар ўрнатилгани аниқланган.

Маълум қилинишича, мазкур қурилмалар сув ҳарорати, шўрланиш даражаси, океан оқимлари каби муҳитга оид маълумотларни реал вақт режимида йиғиб, сунъий йўлдош орқали узатиш имкониятига эга.

Бироқ вазирлик ушбу ҳайвонлар қаерда аниқлангани ёки сенсорлар қайси давлат ёки ташкилот томонидан ўрнатилгани ҳақида аниқ маълумот келтирмаган.

Шунингдек, Хитой хавфсизлик идоралари хорижий денгиз тадқиқот марказлари томонидан жойлаштирилган деб тахмин қилинаётган сузувчи буйларни ҳам аниқлаганини маълум қилди. Расмийларга кўра, бу қурилмалар метеорологик сенсорлар билан жиҳозланган бўлиб, сувости кемалари ҳаракатига оид маълумотларни кузатиш имконини берган.

Баёнотда яна тўлқин энергияси ва қуёш нурлари ҳисобига ишлайдиган автоном қурилмалар ҳақида ҳам сўз борган. Хитой томонининг фикрича, бундай технологиялар орқали ҳарбий аҳамиятга эга денгиз маълумотлари ҳамда кемалар ҳаракати ҳақидаги ахборотлар йиғилмоқда.

Хитой оммавий ахборот воситалари маълумотига кўра, мамлакат ҳукумати сув ҳудудларида жосуслик қурилмаларини аниқлаган балиқчиларни 50 мингдан 500 минг юангача мукофотлаш амалиётини жорий этган.