“Сиз саломлашинг, сизга ҳам салом беришади”

Ушбу шиор остида 21 ноябрь санасида Бутунжаҳон саломлашиш куни ўтказилади. 1973 йил бу байрамни америкалик икки ака- ука Майкл ва Браен Маккомаклар Миср ва Исроил ўртасидаги уруш авжига чиққанда ўйлаб топишган. Дунёдаги тинчлик учун туғилган бу ҳаракатга қўшилишга ҳеч кимни мажбур қилишмаган. Шундай бўлса-да бу ғояни 180 та давлат қўллаб-қувватлайди. Бутунжаҳон саломлашиш кунини ҳамон турли касбдаги ва ёшдаги фуқаролар нишонлаб келишади.

Халқаро телевидение куни

Телевидение тарихи деярли бир аср аввалги даврга бориб тақалади.
1996 йилда Бирлашган Миллатлар Ташкилоти Бош ассамблеяси илк маротаба Бутунжаҳон телевизион форумини ташкил этиш ҳақида қарор қилиб, тадбир ўтказиладиган санани "Халқаро телевидение куни" деб эълон қилган. Гарчи дунёнинг кўпгина мамлакатларидаги соҳа вакиллари 21 ноябрни байрам сифатида нишонласа-да, бошқа барча айёмлар каби ушбу кунда ҳам жавлон уриб ишлайверадилар.
Кўплаб манбаларда телевизорнинг ватани дея Тошкент эътироф этилган. Электрон телевидение тизими 1928 йилда тошкентлик икки кашфиётчи Б.П. Грабовский ва И.Ф. Белянский томонидан яратилган. Тажриба сифатида қўлланилган илк телевизион ускуна ўша пайтда "телефот” деб номланган.

Туринда шоколад фестивали

2003 йилдан буён ўтказиладиган Турин шоколад фестивали бошланиш санаси ҳам 21 ноябрга белгиланган (2014 йил ҳисоби бўйича). Ҳозирги вақтда Туринни Италиянинг шоколад маркази деб аташ мумкин. Бу ерда ҳар йили 85 минг тонна шоколад ишлаб чиқарилади. Бу эса дунёда ишлаб чиқарилган маҳсулотнинг 40 %ини ташкил қилади. "CиоccолаТо” фестивали ўн кун давом этади ва шу кунларда кўплаб томошалар, маданий тадбирлар, ўйинлар ва болалар учун мусобақалар ўтказилади. Лекин воқеалар марказида, албатта, шоколад туради. Шоколаддан хоҳлаганча татиб кўриш, ишлаб чиқаришни кузатиш, маҳаллий шоколадга баҳо бериш мумкин. Кўргазма майдонида шоколад фабрикаси ишлаб туради.