1211: “Уч йиллик муаммойим бир зумда ҳал бўлди...”
Мен собиқ турмуш ўртоғимдан 5 ёшли фарзандим учун уч йилдан буён на алимент ва на бошқа ёрдам ололмай, сарсонликда юрган бир она эдим. Бу орада алиментдан қарздорлик ҳам нақ 12 млн сўмга етди.
Рўзғор ташвишлари билан қийналиб, қайси идорага мурожаат қилишни билмай сарсон бўлиб юрган кунларимнинг бирида Ўзбекистон касаба уюшмалари Федерациясининг хотин-қизлар муаммолари билан ишлайдиган 1211-Ишонч телефони ҳақида эшитдим. Қўнғироқ қилдим, мурожаатимни диққат билан эшитишди. Буни қарангки, кўп ўтмай пластик картамга 6 миллион сўмдан зиёд маблағ келиб тушди! Бу маблағга шунчалар муҳтож эдимки, гўёки ичим ёришиб кетгандек бўлди, жуда қувондим. Кейин масъул идорадан алоқага чиқишиб, алимент бўйича қолган қарздорлик ҳам ундирувга қаратилгани ва яқин кунларда тўлаб берилишини билдиришди.
Бугун мен 1211-Ишонч телефони орқали мурожаатимни эътиборсиз қолдирмаган, уч йиллик муаммойимни бир зумда ҳал қилиб берган барча масъулларга чин дилдан миннатдорчилик билдираман. Мен каби мушкул вазиятда қолган хотин-қизлар учун бундай ишонч телефони борлиги – катта кўмак ва умид манбаи. Катта раҳмат сизга, доим бор бўлинг, яхши инсонлар!
Дилафруз Турғунбоева,
Ангрен шаҳри.
