Бухорода “Ишонч кунлари” анъанавий тарзда кўтаринки кайфият ва самимий мулоқот муҳитида ўтди. Учрашувда газета фаолияти, унинг жамиятдаги ўрни ва сўзнинг кучи, таъсири ҳақида фикрлар билдирилди.

Тадбирда “Ишонч” газетаси адабий котиби Абдунаби Ҳайдаров, таҳририят бош ҳисобчиси Исомиддин Суюнов, Бухоро вилояти касаба уюшмалари кенгаши раиси Муҳаммадқосим Олимов, касаба фаоллари ва муштарийлар иштирок этди.

Ўзбекистонда хизмат кўрсатган журналист Абдунаби Ҳайдаров “Ишонч” газетаси, Ishonch.uz сайти ва “Ватан” журнали орқали ахборот маконидаги нуфуз мустаҳкамлаб бораётганини таъкидлади.

Қайд этилганидек, жорий йилнинг ўтган даври мобайнида Бухоро вилояти касаба уюшмалари фаолияти ҳамда бошқа мавзуларни қамраб олган юзга яқин таҳлилий, танқидий ва ижтимоий руҳдаги мақолалар чоп этилиб, уларда фақат фактлар эмас, балки муаммолар ечимига оид таклифлар ҳам илгари сурилган.

Учрашувда “Ишонч” жамоаси билан ҳамкорлик қилиб келаётган касаба уюшмалари ва ташкилот раҳбарларининг фаоллиги ҳам алоҳида эътироф этилди.

Тадбир ниҳоясида фаол иштирокчиларга миннатдорлик билдирилиб, ҳамкорликни янада кенгайтириш, жамиятдаги долзарб масалаларни очиқ ва холис ёритишда биргаликда иш олиб бориш зарурлиги таъкидланди.

Дилдора ИБРОҲИМОВА,
Ishonch.uz