Нима учун? Бу савол нафақат ногиронлиги бор шахслар ёки аёллар учун, балки умумий аҳоли учун ҳам муҳим. Ҳозир “механика ўрганиш” реал ҳаётда фойда бермаса, бу талабнинг қанчалик маъноси бор?

Автоматда ҳайдашни истовчилар механикага мажбурланмоқда. Натижада кўпчилик ҳайдовчиликни орқага суряпти, айримлар имтиҳондан ўтолмаяппти ҳам.

Ҳатто тўлиқ автомат машина харид қилган инсон ҳам механикада синов топширишга мажбур бўляпти. Бу амалиёт билан назария ўртасидаги боғлиқлик йўқлиги кўрсатади. Ресурс, вақт, асаб ва йўл ҳаракати хавфсизлиги нуқтаи назаридан ҳам бу қарор қайта кўриб чиқилиши кераклигини кўрсатмоқда.

Масалан, Европа ва АҚШда автомат трансмиссияда синов топширган ҳайдовчиларга “A only” (фақат автомат) ёзуви туширилади. Агар кейин механика ўрганишни истаса — қўшимча имтиҳон топшириб, “full” рухсатнома олади. Оддий ва аниқ.

Биздачи?

Бизда ҳали ҳам “автомат ҳайдайман” десанг, “аввал механикада машқ қил, синов топшир, кейин ким нима минишини ўйлаб кўрамиз” дейишади.

Аммо ҳаёт ўзгарди.

Йўлларда механика эмас, логика юриши керак.

Келажак автоматлашмоқда, синов эса ўтмиш билан яшаяпти. Бу эса адолатли ва ҳаққоний ечим эмас.

Ҳайдовчилик имтиҳонларида ҳам танлов ҳуқуқи бўлиши керак: автомат ҳайдовчилар автоматда синов топширсин, механикага қизиққанлар ўша усулни танласин.

Хуллас калом, бугунги автомат трансмиссия ҳаётга кириб келган бир вақтда ҳаммадан механик қоида талаб қилиш — бу юлдузли осмонни эски кўзойнаклар билан кузатишга ўхшайди. Ҳолбуки, бу тараққиёт эмас, аксинча тўхтаб қолиш, демакдир.

Дилдора ИБРОҲИМОВА,
ishonch.uz