Янги қоидаларга мувофиқ, фуқаролик олиш учун мурожаат қилаётган чет эл фуқаролари ўз давлатининг ваколатли идораси томонидан берилган судланмаганлик ёки жиноят ишлари бўйича чиқарилган суд ҳукми ҳақидаги расмий маълумотномани тақдим этиши шарт. Ушбу ҳужжат ариза топшириш санасидан кўпи билан уч ой олдин расмийлаштирилган бўлиши лозим.

Аввалги тартибда ҳам судланганлик ҳолати фуқаролик беришни рад этиш учун асос сифатида белгиланган эди. Бироқ маълумотноманинг амал қилиш муддати аниқ кўрсатилмаганди. Янги фармон айнан шу жиҳатни тартибга солди.

Шу билан бирга, Украинадан Россияга кўчиб келган шахслар учун истисно сақлаб қолинди. Улар 2028 йил 1 январга қадар мазкур маълумотномани тақдим этиш талабидан озод этилади.

Расмийларга кўра, мазкур чоралар мамлакат хавфсизлигини мустаҳкамлаш ва миграция соҳасидаги назоратни кучайтиришга қаратилган. Аввалроқ Россия Хавфсизлик кенгаши раиси ўринбосари Дмитрий Медведев жиноий ўтмиши бор мигрантлар давлат барқарорлиги учун муайян хавф туғдириши мумкинлигини таъкидлаб, бу борадаги назоратни янада кучайтириш зарурлигини билдирган эди.