Ўзбекистон-Афғонистон-Покистон темир йўли қачон қуриб битказилиши айтилди
Шунингдек, яна бир муҳим лойиҳа – Хитой-Қирғизистон-Ўзбекистон темир йўли қурилиши ҳақида ҳам айрим тафсилотлар очиқланди.
Марказий Осиё мамлакатларига Ҳинд океани портига чиқиш имкониятини берувчи трансафғон темир йўл лойиҳасининг 2027 йил охиригача якунланиши кутиляпти.
Бу ҳақда Тошкент халқаро инвестиция форуми доирасида ташкил этилган «Инфраструктурадаги инвестицион лойиҳалар» мавзусидаги панел сессиясида транспорт вазири ўринбосари Жасурбек Чориев маълум қилди.
“Лойиҳа учта давлатни бир-бирига боғлашга ёрдам беради — Ўзбекистон, Афғонистон ва Покистон. Темирйўл Евросиё транспорт йўлагини яратишда муҳим рол ўйнайди. Натижада Марказий Осиё мамлакатлари Ҳинд океани портига чиқиш имконига эга бўлади. Темирйўл товарлар етказиб бериш муддатини 35 кундан 5 кунгача қисқартиради. Товарларни етказиб бериш нархи эса камида 40 фоизга пасаяди. Лойиҳа 2027 йил охиригача якунланиши кутилмоқда”, – дейди транспорт вазирининг биринчи ўринбосари.
У, шунингдек, яна бир муҳим лойиҳа – Хитой–Қирғизистон–Ўзбекистон темир йўли қурилиши ҳақида ҳам тўхталиб ўтди.
“Бу нафақат Ўзбекистон, балки бутун Марказий Осиё ривожланишида катта рол ўйновчи темирйўл бўлади. Лойиҳанинг асосий келишувлари аллақачон ҳал қилинган бўлиб, унинг қиймати тахминан 5,1 миллиард долларни ташкил қилса, узунлиги ҳозиргача 454 км бўлиши кутилмоқда”, — дейди Жасурбек Чориев.
Mақолага баҳо беринг
0/50
0
0
0
0