Болалар омбудсмани жорий йилнинг 22 апрель куни ижтимоий тармоқларда тарқалган Жиззах вилоятидаги мактабда 1-синф ўқувчиларининг стул кўтариб тургани акс этган видеотасвир юзасидан муносабат билдирди.

Аниқланишича, 22 апрель куни Зарбдор туманидаги 5-сонли умумтаълим мактабда 1-“А” синфга ўтилаётган инглиз тили дарсида 1999 йилда туғилган ўқитувчи Р.Т. ўқувчилардан уйга берилган вазифаларни сўраган. 6 нафар ўғил ва 7 нафар қиз болаларини дарсга тайёргарлик кўрмасдан келганликлари туфайли гўёки тарбиявий чора сифатида синфхонасидаги ўзлари ўтирган стулларни кўтаришга мажбур қилган.

Ушбу ҳолатни эса ўзининг телефон аппаратида видео тасвирга олиб, телеграм ижтимоий тармоғи орқали шу мактабнинг ота-оналар гуруҳига юборган.
Ҳозирда мазкур ҳолат юзасидан Зарбдор тумани ИИБ томонидан терговга қадар текширув ҳаракатлари олиб борилмоқда.

“Болаларга нисбатан турли шаклдаги зўравонлик ёки зўравонликка таянган тарбия чораларини, жумладан, ғайриинсоний ёки қадр-қимматни камситувчи муомала ҳамда жазо турларини қўллаш қонунан тақиқланган ва тегишли жавобгарликка асос бўлади”, – дейилади Болалар омбудсмани расмий муносабатида.