Тошкентдаги энг қадимий қўлёзма Қуръон – “Усмон мусҳафи” консервация қилинади
Муқаддас Китоб VII асрда ҳижоз хатида ёзилган бўлиб, Ўзбекистон мусулмонлари идораси музей кутубхонасида сақлаб келинмоқда.
Тошкентда ЮНЕСКО томонидан “Жаҳон хотираси” рўйхатига киритилган “Усмон мусҳафи” қадимий қўлёзмасини консервация ва реставрация қилиш ишлари режалаштирилган.
Президент ёрдамчиси Саида Мирзиёеванинг ёзишича, бу давлат раҳбарининг топшириғига кўра амалга оширилмоқда.
“Ушбу эзгу ишга ўз ҳиссасини қўшадиган барчага миннатдорлик изҳор этаман. Биргаликда биз муқаддас қўлёзмани келажак авлод учун сақлаб қола оламиз”, – деб ёзади Мирзиёева.
Маълум қилинишича, мазкур Муқаддас Китобни консервация ва реставрация қилишда хорижлик мутахассислар, жумладан Кембриж университетидан Кристине Росе, франсиялик реставраторлар Ахелле Делеау ва Cоралие Барбе, шунингдек, Истанбул қўлёзмалар устахонаси ва архив бўлими мудири Нил Байдарлар иштирок этмоқда. Улар ҳар бир саҳифани синчиклаб кўздан кечириб, босқичма-босқич таъмирлаш режасини ишлаб чиқадилар ҳамда келгусида муҳофаза қилиш бўйича тавсияларни берадилар.
Эслатиб ўтамиз, “Усмон мусҳафи” Қуръони каримнинг бугунги кунгача сақланиб қолган энг қадимий қўлёзмаси ҳисобланади. Муқаддас Китоб VII асрда ҳижоз хатида ёзилган бўлиб, ҳозирда Ўзбекистон мусулмонлари идораси музей кутубхонасида сақланади. 1997 йилда ЮНЕСКО уни “Жаҳон хотираси” рўйхатига киритган.
Mақолага баҳо беринг
0/50
0
0
0
0