Россиядан қайтарилган 20 тоннага яқин помидор ички бозорда сотилган
Самарқанд вилояти Ўсимликлар карантини ва ҳимояси бошқармаси матбуот анжуманида яқинда Россиядан қайтган 19860 кг помидор маҳсулоти ички бозорда сотилганлигини маълум қилди.
Хўш, улар диёримизда ундирилган помидорни тановвул қилишдан нега бош тортишди? Бошқарма бошлиғи ўринбосари М.Маллаевнинг маълум қилишича, экспортга чиқарилган ушбу маҳсулот учун ҳам ПЦ хулосаси, ҳам ички ва ташқи сертификат хулосадари расмийлаштириб берилган. Юк етиб борганда улар маҳсулотда жигарранг тусдаги бужмайиш касаллиги борлигини билдириб, помидорни ортга қайтарган. Мутасаддининг айтишича, қайтарилган помидор ва у етиштирилган майдондаги қолдиқни қайтадан текширганида, ҳеч қандай касаллик аломатлари аниқланмаган ва тегишли рухсат билан помидор ички бозорда сотилган.
Маълум қилинишича, Марказий фитосанитар лабораторияси республика агентлиги халқаро аккредитациядан ўтган ва бу лабораториянинг хулосаси барча давлатларга ўтар эмиш. Қолаверса қоидага кўра, экспорт қилинаётган маҳсулот марказий фитосанитар лабораториядан ўтганлиги тўғрисида ПЦ-анализ бўлмаган маҳсулот хорижий давлат чегарасидан хатлай олмас экан.
Таажжуб, биз томонда ҳаммаси рисоладагидек бўлса-да, ҳамкорларимизнинг “ноз, фироғи” кўпайиб кетмаятимикан? Ҳали гилос ҳали бензин, туршагимизгача ёқмаса-я. Нима бўлаяпти ўзи? Ҳар тугул, бу гал помидорни етиштирган тадбиркор куймабди. Бахтимизга ички бозоримиз бор. Ўзимизнинг ошқозонимиздан қўймасин. Бужмайганми, тиришганми ҳазм қилиб юбораверамиз. Ҳали ҳеч кимни тешиб чиққани йўқ-ку. Аммо шу қўшниларни тушунолмай сал гарангмиз. Ёки улар амалиётда қўллаётган ПЦ текширувида бирор носозлик бор ёки... Ҳа майли. Айни пишиқчилик остонасида турибмиз. Ҳартугул энди жўнатган помидор, гилос ва меваларимиз ҳамкорлар “ПЦ”сидан ўтиб кетсин. Акс ҳолда белимиз қийшайиб, харажат тортганимиз қолади.
Mақолага баҳо беринг
0/50
0
0
0
0