Терговчига нисбатан ЖКнинг 210-моддаси 3-қисми «а» банди билан жиноят иши қўзғатилиб, қамоққа олиш тарзидаги эҳтиёт чораси қўлланди.

Афсуски бу охирги олти ойда Тошкент шаҳрида прокуратура ходимларининг коррупция билан боғлиқ жамоатчиликка маълум тўртинчи ҳолат».

Мана шу хабардан кейин бир нарсани ўйлаб қолдим. Коррупцияда гумонланиб, қўлга олинаётган прокурорлар томонидан айнан порахўрлик бўйича қанчадан-қанча жиноят делолари тузилган. Хўш, уларнинг тақдири нима бўлади? Ҳар ҳолда ўзи ғирт муттаҳам бўла туриб, бошқаларни бу ишда айблаш адолатдан эмас.

Бир пайтлар коррупцион жиноятларда айбланган прокурор ва судьялар томонидан очиилган жиноят ишлари қайта кўрилиши кераклиги ҳақида гаплар кўтарилганди.

Хусусан, Олий Мажлис Қонунчилик палатаси Спикери ўринбосари Одилжон Тожиев томонидан Ўзбекистонда пора билан қўлга тушган судялар ва прокурорлар томонидан кўрган ишларни қайта кўриб чиқишни таклиф қилган эди.

«Бугун яна бир прокурор пора билан қўлга тушди. Ўтган ҳафта эса Мингбулоқ туман суди раиси пора билан қўлга олинган эди.

Афсуски, бундай ишлар одатий ҳолдек ўтиб кетмоқда. Бироқ қонунни амалда қўллаш орқали қонунийликни таьминлаш асосий бурчи бўлган бу каби шахсларнинг ўзлари қонунни бузишаётгани одамларда қонунларга, пировардида эса давлатга бўлган ишончни йўқотади.

Шу боис, бундай шахсларнинг жиноятига баҳо беришда уларнинг ўтган фаолияти давомида фуқароларга нисбатан тасдиқлаган айблов хулосалари ва қабул қилган қарорларига ҳам баҳо берилиши керак. Чунки бу каби нолойиқ шахсларнинг ҳаракатлари оқибатида қанчадан-қанча фуқаролар ноҳақ айбланиб, ноҳақ судланиб кетган бўлиши мумкин», дея ёзганди ўшанда Одилжон Тожиев.

Ҳақиқатан ҳам, қонунчиликни мана шу йўналишда такомиллаштириш зарур. Айниқса, коррупция билан боғлиқ жиноятда айбланган шахслар кўриб чиққан барча материаллар кўтарилиб, қайта кўриб чиқилиши керак, назаримизда. Шунда адолатдан бўлади. Аммо бу бўйича ҳозирча ҳеч қандай ўзгариш йўқ, балки бўлмас ҳам...

Тасаввур қилинг, қайсидир шахс 200 АҚШ доллар ёки 2 миллион сўмнинг нари-берисида пора олганликда гумонланиб қўлга олинса-ю, унга қарши дело очган прокурорнинг ўзи кўп ўтмай, катта миқдорда пора билан қўлга тушиб турса… Ажабланарлиси, бундай ҳолатлар халқдан яширилса. Оддий фуқаро ёки шифокор, ўқитувчи арзимаган маблағ билан қўлга тушса, айнан шу ташкилотлар буни ноғора қилиб чалади. Ўзларининг ходими катта миқдордаги пул билан қўлга олинса, «ўрага сичқон тушди, гулдур-гуп» қабилида иш тутади. Хуллас, бир хил вазиятга икки хил ёндашув… ҳа, табибнинг ўзи бемор бўлса, дардингни кимга айтасан, деб шунга айтсалар керак-да…