2026 йил июнь ойида 96 мингдан ортиқ фуқаро Солиқ қўмитасининг шубҳали харидорлар реестрига киритилди.

Маълум қилинишича, улар ҳақ эвазига бошқа шахслардан олинган сохта ёки ўзларига тегишли бўлмаган харид чекларини «Солиқ» мобил иловасида рўйхатдан ўтказган.

Солиқ қўмитаси эслатишича, фақат ўзингиз амалга оширган харидлар ва фойдаланган хизматлар учун берилган чекларни рўйхатдан ўтказиш мумкин. Ижтимоий тармоқлар ёки бошқа шахслар орқали тарқатиладиган чеклардан фойдаланиш қонунбузарлик ҳисобланади ва кешбэк олиш ҳуқуқининг чекланишига сабаб бўлиши мумкин.

Шунингдек, июнь ойи учун 5,5 миллиондан ортиқ истеъмолчига 112,8 млрд сўм кешбэк тўлови тасдиқланган. Қолган маблағлар тадбиркорлар томонидан солиқ ҳисоботлари топширилиши ва камчиликлар бартараф этилганидан сўнг автоматик тарзда тасдиқланади.

Эслатиб ўтамиз, Ўзбекистонда амалдаги 1 фоизлик солиқ кешбэки тизимини бекор қилиш таклифи ҳам илгари сурилган.