Адли вазирлиги шартномавий-ҳуқуқий муносабатларда кучсиз томоннинг ҳуқуқ ва манфаатларини ҳимоя қилишга қаратилган қонун лойиҳасини жамоатчилик муҳокамасига қўйди.

Лойиҳада шартномаларда иккинчи томон учун очиқдан-очиқ оғир ва адолатсиз шартларни белгилашга йўл қўймаслик, томонларнинг ҳуқуқ ва мажбуриятлари ўртасида жиддий номутаносиблик келтириб чиқарувчи шартлар қўйишни тақиқлаш, шартнома матнида уни тушунишни қийинлаштирадиган мураккаб атамалардан фойдаланишни чеклаш, шартномаларда келгусида низо келиб чиқса, бир томоннинг манфаатларига хизмат қилувчи, яъни унинг жавобгарлигини истисно этувчи шартларни белгиламаслик каби жиҳатлар назарда тутилмоқда.

“Масалан, улуш киритиш асосида уй-жой қурилиш шартномаларида қурувчи томонидан уй-жойни топшириш муддатини асоссиз равишда кечиктириб шартномани ўз вақтида бажармаганлик учун қурувчига нисбатан ҳеч қандай жавобгарлик чоралари белгиланмаслиги мумкин. Ёки тижорат банклари билан тузиладиган кредит шартномаларида кредит маблағларининг муайян қисмини асоссиз равишда қарздорнинг банк ҳисобварақасида доимий сақлаб туриш каби шартлар белгиланиши мумкин.

Натижада иккинчи томон (истеъмолчи) шартномада келтирилган шартларнинг ўзи учун ноқулай ва адолатсиз эканлигини била туриб, ўзгартира олмасдан, ўз манфаатларига зид шартларга кўнишга мажбур бўлмоқда” дейилади Адлия вазирлиги хабарида.