Энг юқори ўсиш молиявий хизматларда қайд этилди — 124,9 фоиз. Бу банк хизматлари, онлайн тўловлар, кредитлаш ва суғурта бозори фаоллиги ортиб бораётганини англатади. Иккинчи ўринда алоқа ва ахборотлаштириш хизматлари (122,2 фоиз) жойлашди. Рақамли трансформация жараёнлари, интернет ва IT хизматларига талабнинг ўсиши ушбу соҳани иқтисодиётнинг муҳим драйверларидан бирига айлантирмоқда.

Таълим хизматларининг 121,0 фоизга ўсиши инсон капиталига инвестициялар ортиб бораётганини кўрсатади. Бу аҳоли ва бизнеснинг касбий тайёргарлик ҳамда малака ошириш хизматларига қизиқиши кучайиб бораётганидан далолат беради.

Шунингдек, ижара хизматлари (117,6 фоиз) ва кўчмас мулк билан боғлиқ хизматлар (117,5 фоиз)даги юқори ўсиш қурилиш бозори ва тадбиркорлик фаоллигининг кенгайиши билан боғлиқ. Меъморчилик ва муҳандислик хизматларининг 115,3 фоизлик ўсиши эса инфратузилма ҳамда инвестиция лойиҳалари ҳажми ортиб бораётганини англатади.

Истеъмол бозори билан боғлиқ хизматлар ҳам ижобий динамикани сақлаб қолди. Жумладан, соғлиқни сақлаш хизматлари 114,7 фоиз, яшаш ва овқатланиш хизматлари 114,1 фоиз, савдо хизматлари 114,0 фоиз, транспорт хизматлари 113,3 фоизга ўсди. Бу аҳоли даромадлари ва хизматларга бўлган талаб барқарор сақланаётганини кўрсатади.