Тадбирда оила, миллий қадриятлар ва ОАВнинг жамият тарбиясидаги ўрни ҳақида самимий фикрлар билдирилди. Аммо йиғиннинг энг таъсирли қисми халқимизнинг севимли журналисти Нозима Воҳидова ва унинг оиласи ҳақида айтилган илиқ сўзлар бўлди.

Айтишларича, Нозима опа фарзандларига “Менинг хизматимни қилинглар” дейдиган она, қайнона эмас. Аксинча, “Ўқинглар, изланинглар, дунё кўринглар” деб, фарзандлари ва келинининг орзуларига елкадош бўлиб, уларни қўллаб-қувватлаб келаётган меҳридарё она.

Бугун ўғли Беҳрузбек Германияда халқаро мактабда дарс бераётган кучли педагог. Келинлари малакали шифокор. Қизлари эса Францияда 4000 нафар олим қатнашган халқаро танловда биринчи ўринни эгаллаб, ҳозир Германия университетида фаолият юритмоқда.

Тадбирда Нозима Воҳидованинг турмуш ўртоғи Алишер ака билан биргаликда илм, тарбия ва меҳр устунига қурган ана шундай зиёли оиласига кўпчиликнинг ҳаваси келди.

Оила ва хотин - қизлар қўмитасининг қарори билан тасдиқланган кўкрак нишони тантанали топширилар экан, йиғилганлар ушбу оиласини самимий қутлади.

Қутловдан сўнг Журналист аёллар кенгашида кун тартибидаги бошқа масалалар ҳам муҳокама қилинди.

Зебо Намозова
ishonch.uz