Футбол бўйича Ўзбекистон миллий терма жамоаси Нью-Йорк шаҳридаги Icahn стадионида ўтказилган ўртоқлик учрашувида Нидерландияга 2:1 ҳисобида мағлуб бўлди.

Ўйиннинг биринчи бўлимида, 32-дақиқада нидерландиялик ҳужумчи Коди Гакпо пенальтидан унумли фойдаланиб, ҳисобни очди. Танаффусдан кейин ўзбекистонлик футболчилар ташаббусни қўлга олишга ҳаракат қилди ва бир қатор хавфли вазиятлар яратди.

Учрашувнинг 87-дақиқасида Гус Тил қизил карточка олиб, майдонни тарк этди ва Нидерландия бир нафар футболчиси кам ҳолатда қолди. Сон жиҳатидан устунликка эга бўлган миллий жамоамиз 90+2-дақиқада Игорь Сергеевнинг голи эвазига ҳисобни тенглаштиришга муваффақ бўлди.

Бироқ баҳснинг сўнгги лаҳзаларида омад рақиб томонида бўлди. Ҳакам томонидан қўшиб берилган 90+7-дақиқада Коди Гакпо яна пенальтини аниқ амалга ошириб, жамоасига ғалабани тақдим этди.

Статистикага кўра, Нидерландия тўп назоратида устунлик қилди — 65 фоизга қарши 35 фоиз. Зарбалар сони бўйича ҳам мезбонлар олдинда бўлди (15:8), дарвоза томон аниқ йўналтирилган зарбалар нисбати эса 4:1 кўринишида қайд этилди.

ФИФА рейтингида Нидерландия 7-ўринни эгаллаб турган бўлса, Ўзбекистон миллий терма жамоаси 50-поғонадан жой олган. Эслатиб ўтамиз, жамоамиз бундан аввалги ўртоқлик баҳсида Канадага 2:0 ҳисобида имкониятни бой берган эди.

Ўзбекистон миллий терма жамоаси жаҳон чемпионатидаги илк учрашувини 18 июнь куни Мехико шаҳрида Колумбияга қарши ўтказади. Учрашув Тошкент вақти билан соат 08:00 да бошланади.